Berlusconi kalon natën në spital

Berlusconi kalon natën në spital


Kryeministri italian, Silvio Berlusconi, e ka kaluar natën në një spital të Milanos me hundë e dy dhëmbë të thyer dhe me të çara në fytyrë pas një goditje në fund të një mitingu në qytet.

Dëshmitarët oklularë thanë se kryeministri 73 vjeçar po nënshkruante autografë kur një burrë e goditi nga afër me një statujë të vogël drejt e në fytyrë.

Agjensia italiane e lajmeve (ANSA) thotë se ndaj një 42 vjeçari me probleme të shëndetit mendor, është ngritur akt-padi për sulmin.

Nën vëzhgim

Mjekët vendosën ta mbajnë z. Berlusconi në spital për ta patur nën vëzhgim pas sulmit.

Ai ka pësuar frakturë në hundë, i janë thyer disa dhëmbë dhe ka disa çarje në buzë.

Një burrë 42 vjeçar u arrestua për sulmin. Njoftohet se ai vuan nga probleme të shëndetit mendor.

Një nga aleatët më të ngushtë të z. Berlusconi tha se kjo ishte një ditë e keqe për Italinë.

Zëdhënësi i kryeministrit, tha se z. Berlusconi, që ka qenë në qendër të disa skandaleve dhe proceseve gjyqësore gjatë muajve të fundit, kishte paralajmëruar për një klimë frike dhe agresioni ndaj tij.